.png)
ناس كتير راحت المتحف المصري
واتبسطو وانبهرو من كتر التحف اللي فيه
بس خلينا نتكلم عن كنوزه في مرة تانية ☺️
عشان النهاردة عايزة اوريكم حاجة حلوة أوي أوي
مش بتاخدو بالكم منها خااااالص... مع انها في نفس المكان 🥹
متحف الليجو
متحف الطفل بالمتحف المصري 🇪🇬
ها تلاقوه اول ما تخلصو الجولة في المتحف
وبنفس التكت كمان 🎫
وانصحكم بيه جدا جدا جدا
فسحة تحفة للأطفال
خصوصا لو أول مرة يزوروا متحف
ها تكون بداية مشجعة ومبهرة وممتعة جدا
وها تحببهم في فكرة زيارة المتاحف جدا جدا
هاتساعد وبمنتهى السهولة انهم يرتبطو بالمتاحف من سن صغير
والإهتمام والسؤال عن التاريخ وحكاياته⏳️
المتحف متقسم لقاعات:
القاعة الأولى عن العالم الآخر
وبتعرض لفكرة المصري القديم عن الحياة ما بعد الموت
ويظهر خلالها عمليات التحنيط وأدواته وكيفيته
وبعد كده الموكب الجنائزي
وكمان ما كانت تحتويه مقبرة الميت من ادوات اللي ممكن يستخدمها الميت في الحياة ما بعد الموت
و فيها كمان مومياء معانا هنا في الصور 👇🏻🫣
والقناع الشهير لتوت عنخ أمون من الليجو
متصورين معاه طبعا 👇🏻😎
القاعة الثانية بنشوف فيها الحرف والصناعات عن المصري القديم
زي النجارة والزراعة وكيفية صناعة الطعام
ونماذج للحلي وأدوات التجميل 💎💍💄
والألعاب للكبار والصغار
ونماذج للأدوات الموسيقية 🎵🎼🎶
اللي كان بيستخدمها المصري القديم 🇪🇬
القاعة الثالثة فيها نموذج كبير لتمثال أبو الهول
مصنوعة من قطع الليجو
وفي خلفيته صورة كبيرة لمنطقة الأهرامات
ومعروضات لتعريف الطفل بالتطور التاريخي للحضارة المصرية.
والقاعة الرابعة بتعرف الطفل عن الكتابة عند المصري القديم
وبتوضح بسهولة ليه موضوع الكتابة ده مهم جدا في التاريخ
لأنها قسمت التاريخ إلى:
ما قبل معرفة الكتابة وما بعد معرفة الكتابة
فبعد معرفة الكتابة بدأ المصري القديم عمليات تسجيل تاريخه وحضارته.
القاعة الخامسة مخصصة لأشهر ملوك مصر 🇪🇬👑
بعض التماثيل وبعض النماذج لهم
زي الملك رمسيس الثاني وحتشبسوت وتوت عنخ آمون
وغيرهم من الملوك من مختلف الأسر في الحضارة المصرية القديمة.
أما القاعة السادسة والاخيرة
فمخصصة للمعبودات والآلهة في الحضارة المصرية القديمة
بعضها على شكل آدمي مثل إيزيس وأوزريس وآمون
وبعضها على شكل الطيور والحيوانات 🦅
والمتحف بيقدم دايما فعاليات مجانية للأطفال بمختلف أعمارهم
لتبسيط المعلومات وتقريبها لإدراكهم وتعريفهم بحضارة وثقافة المصري القديم.
والمتحف فيه كمان مكان مخصص للأطفال يلعبوا ويعملوا بنفسهم نماذج بالليجو ☺️
وبيخدم المتحف كمان الأطفال ذوي الاحتياجات الخاصة فاقدي البصر وبيديهم فرصة للتعرف على الحضارة المصرية بشكل ممتع.
روحوا مع الولاد هاتتبسطوا بجد 💜
واستغلو الاجازة بخروجات وفسح وانبساط
وكمان معلومات.. لكن بطريقة كلها لعب وحكايات
فبمنتهى السهولة هيفهموها ويحبوها.. وعمرهم ما ينسوها
دايما اولوية.. لكن خصوصا دلوقتي.. وزي ما كلنا خلاص عارفين..
التاريخ والجغرافيا
وتراثنا وحضارتنا وهويتنا
مهم جدا جدا.. ولادنا يعرفوهم كويس اوي
سعر التذكرة دخول المتحف المصري بـ 30 جنيه للكبار وبـ 10 جنيه للصغار
والمتحف موجود في التحرير أقرب محطة مترو السادات
والمتحف مفتوح كل أيام الأسبوع من 9 الصبح لـ 4 العصر
