الفترة اللي فاتت سمعنا كتير عن الذكاء الاصطناعي وإنه بقى بيغير العالم، من شات جي بي تي لحد أدوات بتكتب أكواد وتصمم صور وفيديوهات، الدنيا بقت سريعة جدًا. وهنا بقى، جوجل قررت تدخل في السكة دي مش بس بأدوات ومنتجات، لكن كمان بتعليم وتدريب لأي حد عايز يدخل المجال.
يعني مش لازم تكون مهندس أو مبرمج من 10 سنين عشان تتعلم ذكاء اصطناعي، جوجل قدمت كورسات ببلاش، أونلاين، تقدر تبدأ بيها من الصفر وتتعلم إزاي تتعامل مع الذكاء الاصطناعي، تستخدمه، تطوره، أو حتى تشتغل بيه
طيب الكورسات دي عبارة عن إيه؟
جوجل أطلقت مجموعة من الكورسات ضمن مبادرة اسمها "Learn with Google AI"، ومن أبرز الكورسات دي:
1. Introduction to AI
كورس بسيط جدًا، بيشرحلك يعني إيه ذكاء اصطناعي، وأنواعه، بيستخدم في إيه، وازاي ممكن يأثر على حياتنا اليومية. الكورس مفيهوش برمجة، وده مناسب لأي حد حابب يفهم المجال من بعيد.
2. Machine Learning Crash Course
ده كورس يعتبر الأشهر، وبيبدأ يشرح مفاهيم تعلم الآلة، اللي هي فرع من الذكاء الاصطناعي. فيه شوية رياضيات بسيطة وتمارين تفاعلية، وكمان بيستخدم لغة Python، بس بطريقة سهلة جدًا. الكورس معمول علشان يساعدك تبدأ تفهم ازاي الموديلات دي بتتعلم وتشتغل.
3. Responsible AI
وده كورس مهم جدًا، بيتكلم عن الجانب الأخلاقي للذكاء الاصطناعي، إزاي نستخدمه بطريقة آمنة، ومن غير ما نضر الناس أو نعمل تمييز. الكورس ده حلو لأي حد بيشتغل في شركات أو عايز يطبق AI في منتجات حقيقية.
4. Google Cloud AI Courses
لو عايز تستخدم أدوات الذكاء الاصطناعي على سحابة جوجل (Google Cloud)، ففيه مجموعة كورسات بتعلمك ازاي تبني، تدرب، وتنشر موديلات AI على الكلاود. ده بقى للمستوى المتوسط أو اللي عنده شوية خلفية برمجية.
طب إزاي أبدأ؟
كل الكورسات دي متاحة أونلاين، معظمها على موقع Google AI أو على منصات زي Coursera وGoogle Cloud Skills Boost. كل اللي محتاجه جهاز كمبيوتر واتصال بالنت.
فيه كورسات كتير مجانية، وبعضها بيطلب تسجيل بحساب جوجل عادي. ولو عايز شهادة، ممكن تدفع رسوم رمزية في بعض الكورسات، بس معظم المحتوى التعليمي مجاني تمامًا.
وده اللينك: